السلام عليكم ورحمة الله وبركاته
قصيدة الجمس
للشاعر: شقير الجذع العتيبي
الجــــــــــــمس
وصاحبـي هـذا محلـه ومبـنـاه قبـل اسبـوعٍ جيـت فيـه ولقيتـه
واليوم جيـت لمنزلـه مـا لقينـاه واللـي لقينـا عقبهـم مـا بغيتـه
شفت الرسوم وجدد الشوق ذكـراه وناديـت باسمـه مرتيـن وبكيتـه
قالوا علامك قلت جفنٍ كفـى مـاه لا رد لي رايـه وانـا ماعصيتـه
خلوه ليـن الدمـع يظهـر خفايـاه امــا ومـرتـه زود ولا نهيـتـه
يمكن غزير الدمع تبـري سوايـاه قلبٍ كواه الحـب انـا مـا كويتـه
سبت خليـلٍ خـلّ قلبـي وخـلاه ماطور مطرودٍ خلـط مـاه زيتـه
جمسٍ مخيف وضايمه طول مسراه وتكانفه جيب الخفـر مـع ونيتـه
لازام قـدمـه والابيـتـر تـعـداه والله رمــاه بفـرقـةٍ مستبيـتـه
جاين عنـه تبليـغ وهيـه تحـراه وراحو معه فالعـرق الاول عميتـه
وعقب احرجوه الجيب دقر له ارطاه وسايق ونيت الخفر غـرز ونيتـه
وهو سرى صفق الهوا مع زوايـاه اعصار عاصوفٍ تسوقـه سحيتـه
وعقب اظهروهن فاختن درب ممشاه وشافولهـم ليتـن يحالـي ليـتـه
جمس ابدويٍ ضايع لـه ولـد شـاه طفله غـدى ويـدوره حـول بيتـه
هنه عطن مجاهاه وهـو بمجاهـاه وراحت سوالفهم اطـلاب وشميتـه
وكلٍ بقى يشمـت خويـه ويشنـاه ويقـول للـرامـي ورا مارميـتـه
قال البلا السـواق غـرز وخـلاه وانا من الربشـه سلاحـي نسيتـه
وهفو مهف امقيط فالضلـع ورشـاه وضاعوا وراحوا فالخلا عن فتيتـه
والجمـس سواقـه بليلـه تسـراه الحمـل جايـر والهـوا مجتفيتـه
وقعد خوي دريول الجمـس ينهـاه ويقول ضاعوا قـال ياليـت ليتـه
ولا المدارا اليوم مـا بـه مـداراه والله لنـزل حملتـه مـا دريـتـه
وليا انكسر مـن تانكيـه حرقنـاه امـا فـقـر ولا حـيـاةٍ بخيـتـه
وسروا وحمله تالـي الليـل وطـاه فالموقـع اللـي نيـتـه منتويـتـه
وعقب أمنه وقـف وحـول وطفـاه واصبح ليا نـص الشنابـر حتيتـه
الوجه رايح والاديتـر كفـى مـاه وعيار زيته ناقصـن عنـه زيتـه
قالوا علامه قال مـن كثـر ماجـاه ليـا حـداه العـرق يمـه حديتـه
ليا انثنى العـرق الموالـي قطعنـاه وليا زما العرق المناحـر نصيتـه
بثنيـن احـده ونهـمـه وتـحـداه وليا عصاني عن طلوعه عصيتـه
انحـره عـرق طـويـلٍ مـعـداه ولا عـذاعـذ خـلـتٍ مستميـتـه
خايف وحاديني مقاطـع ومضمـاه ولو لا كذا عن ماجرى لـه رفيتـه
قيره و أبنصه والدركسـون يجـداه وان ضيع الـدرب الدليلـه قديتـه
وهذا ودرب الجمس كملـت معنـاه بقـافٍ لعشـاق المثايـل بنيـتـه
تعبيـر مـن عينـه بخلـه مشقـاه الصاحب اللي لـو نسـي مانسيتـه
احـب اجامـل خاطـره وترضـاه وليا قطع وصلي علـى الله شكيتـه
لو هو جفاني بالهوى مقـدر اجفـاه وان باعني برخيص غالي شريتـه
لونـي لـو قلـت احلـي حلايـاه اتعب وبعض اوصافهـم مـا لقيتـه
الضبي فيهـا جملـة مـن حلايـاه والخيل فيه اصوف منـه ان هقيتـه
زينٍ طبيعـي بـس كحلـه وحنـاه ما خالطـه شـي معـه مشتريتـه
وجدي عليهم ياهل العـرف وجـداه وجد اليتيـم اللـي تقـول وتليتـه
عوبـاٌ توريـه العزايـر وتقـفـاه وثقبهـا اللـي جعـل ينهـد بيتـه
ليا بكي قالت هذا الـورع شـرواه يبكي لو انـي كـل شـي عطيتـه
عقب امه اللـي تاخـذه بالمـداراه اونس مـن العمـه حيـاة الشميتـه
صح اللسان الشاعر : شقير الجذع
أعداد اخوكم : عبدالله خلف جلعود العتيبي
ليست هناك تعليقات:
إرسال تعليق